(បាត់ដំបង)៖ កាកបាទក្រហមកម្ពុជាសហកាជាមួយសាខាកាកបាទក្រហមកម្ពុជាខេត្តបាត់ដំបង បានរៀបចំបើកវគ្គបណ្តុះបណ្តាល និងផ្សព្វផ្សាយស្តីពីការយល់ដឹងអំពីមីន និងកាកសំណល់ជាតិផ្ទុះពីសង្គ្រាម ការធ្វើចំណាកស្រុកប្រកបដោយសុវត្ថិភាពនិងសេវាកម្មស្តារទំនាក់ទំនងគ្រួសារ, គោលការណ៍គ្រឹះទាំង៧ ប្រការរបស់ចលនា និងសហគមន៍មានសុខភាពល្អ និងមានភាពធន់នឹងអាកាសធាតុ ដល់អ្នកស្ម័គ្រចិត្តកាកបាទក្រហមកម្ពុជា និងប្រជាពលរដ្ឋសរុបប្រមាណជិត១០០នាក់ នៅឃុំតាតោក។វគ្គបណ្តុះបណ្តាលមានរយៈពេល២ថ្ងៃ ចាប់ពីថ្ងៃទី៣០ ដល់ថ្ងៃទី៣១ ខែឧសភា ឆ្នាំ២០២៤ ស្ថិតនៅសាលាឃុំសំឡូត និងនៅភូមិភ្នំរៃ ឃុំតតោក ស្រុកសំឡូត ខេត្តបាត់ដំបង។វគ្គបណ្តុះបណ្តាលនេះធ្វើឡើងក្នុងគោលបំណង ដើម្បីរៀបចំផែនការសកម្មភាព បណ្តុះបណ្តាលអ្នកស្ម័គ្រចិត្ត សម្រាប់ការអប់រំផ្សព្វផ្សាយ លើកកម្ពស់ការយល់ដឹងពីការធ្វើចំណាកស្រុកប្រកបដោយសុវត្ថិភាព និងសេវាកម្មស្តារទំនាក់ទំនងគ្រួសារ។ ផ្សព្វផ្សាយលើកកម្ពស់ការយល់ដឹងអំពីមីន និងកាកសំណល់ជាតិផ្ទុះពីសង្គ្រាម ដើម្បីទប់ស្កាត់កុំឱ្យមានជនរងគ្រោះថ្នាក់ដោយសារគ្រាប់ទាំងនោះបន្តទៀត។ ផ្សព្វផ្សាយអំពីគោលការណ៍គ្រឹះទាំង៧របស់ចលនាកាកបាទក្រហម និងអឌ្ឍចន្ទក្រហម។ ផ្សព្វផ្សាយអំពីសហគមន៍មានសុខភាពល្អនិងមានភាពធន់នឹងអាកាសធាតុ។សូមបញ្ជាក់ថា ជាលើកទីមួយហើយដែល ប្រជាពលរដ្ឋនៅក្នុងភូមិភ្នំរៃ ទទួលបានការផ្សព្វផ្សាយនិងជាទីពីសម្រាប់អ្នកស្ម័គ្រចិត្តដែល ទទួលបានការបណ្តុះបណ្តាល និងផ្សព្វផ្សាយ អំពីការធ្វើចំណាកស្រុកប្រកបដោយសុវត្ថិភាពនិងការលើកកម្ពស់ការយល់ដឹងអំពីមីន និងកាកសំណល់ជាតិផ្ទុះពីសង្គ្រាម និងសហគមន៍មានសុខភាពល្អ និងមានភាពធន់នឹងអាកាសធាតុ ពីកាកបាទក្រហមកម្ពុជា។ មួយវិញទៀតដែលនាំឱ្យមានការបើកវគ្គនេះ ព្រោះក្រុមការងារបានសង្កេតឃើញថា ក្នុងភូមិសាស្រ្តឃុំតាតោកជាតំបន់ដែលប្រឈមការរងគ្រោះដោយសារមីន និងកាកសំណល់ជាតិផ្ទុះពីសង្គ្រាម។លោក មុំ ភិរក្ស ប្រធានការិយាល័យអប់រំមីន និងស្តារទំនាក់ទំនងគ្រួសារ នាយកដ្ឋានទំនាក់ទំនង កាកបាទក្រហមកម្ពុជា បានលើកឡើងថា កម្មវិធីសុវត្ថិភាពសហ គមន៍ បានវិវត្តពីកម្មវិធីសកម្មភាពមីនតាមសហគមន៍ (CBMAP) ដែលត្រូវបានអនុវត្តដោយជោគជ័យតាមរយៈកាកបាទក្រហមកម្ពុជា នៃនាយកដ្ឋានទំនាក់ទំនងក្នុងរយៈពេលជាង១០ឆ្នាំកន្លងមកនេះ។ កម្មវិធីសុវត្ថិភាពសហគមន៍ បានស្វែងរកការទំនាក់ទំនងរវាងកម្មវិធីសកម្មភាពមីនតាមសហគមន៍ ដែលបានគាំទ្រដល់សហគមន៍ជនបទ ជាមួយនឹងការផ្តល់ព័ត៌មានទូទៅនៅក្នុងសហគមន៍ដែលមានហានិភ័យ ហើយកំណត់បាននូវអត្តសញ្ញាណដូចជាគ្រាប់មីន និងសំណល់ជាតិផ្ទុះពីសង្រ្គាមជាដើម។គួបញ្ជាក់ថា វគ្គបណ្តុះបណ្តាកនិងផ្សព្វផ្សាយនេះ ទទួលបានការឧបត្ថម្ភពីអាជ្ញាធរមីនកម្ពុជាតាមរយៈកាកបាទក្រហមកម្ពុជា។ លោក មុំ ភិរក្ស បានលើកឡើងថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋដែលរស់នៅតាមតំបន់ឆ្ងាយដាច់ស្រយាល ធ្លាប់ជាទីតាំងសមរភូមិសង្គ្រាម ដែលបន្សល់ទុកនូវយុទ្ធភ័ណ្ឌមិនទាន់ផ្ទុះ ហើយប្រឈមនឹងការរងគ្រោះថ្នាក់ដោយសារមីន។ ក្នុងន័យនេះ កាកបាទក្រហមកម្ពុជា តែងតែធ្វើការចុះអប់រំផ្សព្វផ្សាយអំពីមីន និងសំណល់ជាតិផ្ទុះពីសង្រ្គាមជូនដល់ប្រជាពលរដ្ឋ។ បន្ថែមពីនេះ ឆ្លើយតបតាមការអំពាវនាវរបស់រាជរដ្ឋាភិបាលកម្ពុជា កាកបាទក្រហមកម្ពុជា ក៏បានចុះអនុស្សរណៈជាមួយអាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (អាជ្ញាធរមីន) ដើម្បីចូលរួមជាចលនាជាតិឆ្ពោះទៅរកសូន្យគ្រាប់មីននៅឆ្នាំ២០២៥ តាមរយៈ «គម្រោងសម្តេចតេជោ សម្រាប់សកម្មភាពមីន» ក្រោមមូលបទ «ផ្តល់ដីសុវត្ថិភាព បង្កើតស្នាមញញឹម» ផងដែរ។វគ្គបណ្តុះបណ្តាលរយៈពេល២ថ្ងៃនេះ ត្រូវបានបញ្ចប់ដោយទទួលលទ្ធផលតាមការគ្រោងទុក ហើយអ្នកស្ម័គ្រចិត្ត និងប្រជាពលរដ្ឋដែលមកចូលរួមទទួលបានចំណេះដឹងថ្មីៗនិងមានការប្តេជ្ញាចិត្តខ្ពស់ក្នុងការអនុវត្ត សកម្មភាពអប់រំផ្សព្វផ្សាយដល់ប្រជាពលរដ្ឋនៅតាមសហគមន៍គោលដៅ និងនៅតាមច្រកព្រំដែនផងដែរ៕
ព័ត៌មានគួរចាប់អារម្មណ៍
សម្តេច ម៉ែន សំអន គាំទ្រប្រធានបទ ភាពជាអ្នកដឹកនាំរបស់ស្ត្រីនៅរដ្ឋបាលមូលដ្ឋាន គឺជាការលើកគុណតម្លៃភាពជាអ្នកដឹកនាំស្ត្រី និងក្មេងស្រី នៅក្នុងរដ្ឋបាលថ្នាក់ក្រោមជាតិ ()
សម្តេចធិបតី ហ៊ុន ម៉ាណែត ចេញលិខិតជូនជនរួមជាតិ អបអរសាទរ «ក្រមាខ្មែរ» ដាក់បញ្ចូលក្នុងបញ្ជីតំណាង នៃបេតិកភណ្ឌវប្បធម៌អរូបីនៃមនុស្សជាតិ ()
ប្រធានវិទ្យាស្ថាន KSI មានជំនឿយ៉ាងមុតមាំថា ក្រោមការដឹកនាំប្រកបដោយចក្ខុវិស័យ និងភាពឈ្លាសវៃរបស់សម្ដេចបវរធិបតី កម្ពុជានឹងបន្តអភិវឌ្ឍ រីកចម្រើនឈានទៅកម្រិតខ្ពស់មួយថែមទៀត ()
សម្តេចធិបតី ឃួន សុដារី ៖ កិច្ចខិតខំប្រឹងប្រែងនិងការរួមវិភាគទានរបស់ IPTP បាននាំមកនូវការសម្រេចបានចក្ខុវិស័យនិងបំណងប្រាថ្នារួមដើម្បីសន្តិភាព វិបុលភាព និងវឌ្ឍនភាពសម្រាប់ប្រជាពលរដ្ឋ ()
ព្រឹទ្ធសភា បន្តសម័យប្រជុំ ដើម្បីបោះឆ្នោតជ្រើសរើស អនុប្រធានទី១ និងអនុប្រធានទី២ ()
វីដែអូ